返回網站

對沖先

2019.03.21

昨天一開市就short call,短期唔睇破頂住,陽燭升穿頂就投降,以昨晚美股走勢來說應該有得甜頭,haters又會話吹水,見跌就話自己沽左,其實邊度有得講大話架,同成大班學生有傾有講,wechat 係real time架,咁多人齊齊傾,無得講大話!
 
至於點解睇破唔到頂住,係見到危機意識近乎零,除了那些一年365日都睇淡既長淡一派,其他人都投了好友陣營,特別是周一好多內房大升10%,大家都去搵下一批急升股,大家掩埋眼去買,麻木自己,咁在大家預期日日創新高既日子,就係我出擊之時。
 
不過,我唔係好淡,嚴格來講,我只係由超睇好,變成睇好,sell call只係對沖一下,持股獲利些少,吼低少少平掉sell call,再買股票。
 
有朋友問幾時,唉,如果我知幾時,就沽期指喇,做得sell call,只係知道唔會急升,跌一跌,就算升番穿頂平倉,都因為時間值及波幅率下降而賺錢而已。
有d長淡陣營,希望大市下跌一成先買貨,現在最高見29541,現在下跌一成要去到29541 x 0.9=26587,26587呢個價位,我可以講短期係唔會到。調整前,最低限度見30000點先,所以如果等26587先黎買貨,有排你等,甚至等唔到。
我估計30000點前,無咩大調整,只有狼來了,嚇鬼既啫,對付嚇鬼,最好用是sell call,所以我sell call。
 
個股好好做
 
個股方面,中到啪啪聲,星期一升得最好的板塊係內房,果時都未升;跟住星期二下午,見物管調整,就轉買物管,尋日升得最好的板塊,不就是物管囉。又係咁多對眼睇住,無得花假,有人又會話「咁好橋啫」,我唔係講十個板塊,我一日只講了一個,全港約有150個板塊,中完一個升得最多的板塊,再中一個升得最勁既板塊的機率是1/150 X 1/150 = 1/22500,邊有得咁好彩,係你無真真正正做功課啫。
 
咁haters又話,又唔在此早講,嘩,我只係技術發燒友,又唔係神仙,只係睇住個圖,d盤路,睇到大戶做緊咩,唔通我識講出年九月三日,個市升幾點咩;但又唔好話我無在這照顧讀者,我上星期拋下a股細佬,即係c股大佬,日日陽燭,等尋日陰燭,都升左10幾巴仙,有無買先?現在市調一調,佢會跟調,可食糊先,回調夠5-6巴仙,或再破頂陽燭,可再次買入。
 
另外有隻華光顯靈,先前講完已升好多,前晚出業績,盈利倒退三成,結果股價只係跌2%,係無細心睇業績既套利啫,現在市調,佢可能再調一下,但第四季營業額,毛利率都升,調完都係要升。